पुणे : सिंहगड रस्त्यावरील राष्ट्र सेवा दलाच्या निळू फुले सभागृहामध्ये जाण्यासाठी निघालेल्या ज्येष्ठ पत्रकार निखील वागळे यांची मोटार अडवून त्यावर अंडी व दगडफेक केल्याचा प्रकार शुक्रवारी सायंकाळी खंडोजीबाबा चौकामध्ये आणि सेनादत्त पोलिस चौकीजवळ घडला होता. याप्रकरणी पर्वती पोलिस ठाण्यामध्ये परस्परविरोधी तक्रारी दाखल करण्यात आल्या होत्या. पर्वती पोलिसांनी याप्रकरणी शनिवारी रात्री भाजप आणि राष्ट्रवादी काँग्रेस पक्षाच्या दहा जणांना अटक केली.

 

माजी नगरसेवक दिपक पोटे, गणेश घोष, गणेश शेरला, बापु मानकर, स्वप्नील नाईक, प्रतीक देसरडा, दुशांत मोहोळ, दत्ता सागरे, गिरीश मानकर आणि राहुल पायगुडे अशी अटक करण्यात आलेल्या आरोपींची नावे आहेत. तसेच, पुढील तपासादरम्यान आणखी आरोपी निष्पन्न झाले तर त्यांच्यावर कारवाई केली जाणार असल्याचे पोलिसांकडून सांगण्यात आले. याबाबत श्रद्धा वसंत जाधव (वय 21, मुंढवा) यांनी पर्वती पोलिस ठाण्यात तक्रार दिली.

 

माजी पंतप्रधान लालकृष्ण अडवाणी यांना भारतरत्न पुरस्कार जाहीर कऱण्यात आल्यानंतर निखील वागळे यांनी अडवाणी व पंतप्रधान नरेंद्र मोदी यांच्यावर आक्षेपार्ह व अपमानास्पद शब्दांत टिका केली होती. त्यामुळे पुण्यात भाजपचे कार्यकर्ते संतप्त झाले होते. त्यातच ‘निर्भय बनो’ कार्यक्रमाचे आयोजन राष्ट्रीय सेवा दलाच्या सभागृहात करण्यात आले होते. या कार्यक्रमासाठी वागळे पुण्यात आले होते. कार्यक्रमाच्या ठिकाणी जात असताना खंडोजीबाबा चौकात अडवली व घोषणाबाजी केली. त्यानंतर, शास्त्री रस्त्यावरील सेनादत्त पोलिस चौक ते मांगीरबाबा चौक दरम्यान मोटार अडवून भाजप कार्यकर्त्यांनी काचा फोडल्या आणि शाईफेक केली, असे जाधव यांनी दिलेल्या तक्रारीत नमूद आहे. 

 

 

दरम्यान, या सभेवरून झालेल्या गोंधळामुळे पर्वती पोलिस ठाण्यात सर्व पक्षांच्या 200 ते 250 कार्यकर्त्यांवर गुन्हा दाखल करण्यात आला. भाजपचे शहराध्यक्ष धीरज घाटे, काँग्रेसचे शहराध्यक्ष अरविंद शिंदे, राष्ट्रवादी काँग्रेस शरदचंद्र पवार पक्षाचे शहराध्यक्ष प्रशांत जगताप, शिवसेना उद्धव बाळासाहेब ठाकरे पक्षाचे शहराध्यक्ष संजय मोरे यांच्यासह 200 ते 250 कार्यकर्त्यांविरुद्ध गुन्हा दाखल आहे. पोलिस शिपाई अनिरुद्ध आनेराव यांनी याबाबत फिर्याद दिली आहे.

 

 

मोटारीवर हल्ला झाला त्यावेळी, आंदोलक आणि वागळे यांच्या वाहनामध्ये साध्या वेशातील पोलीस होते. मात्र प्रचंड वाहतूक आणि जवळ उभे राहणार्‍यांमुळे त्यांना आणि त्यांच्या गाडीला तात्काळ बाहेर काढणे शक्य नव्हते. घटनेत सहभागी असलेल्या आरोपींविरुद्ध दंगल, मालमत्तेचे नुकसान इत्यादी कलमांखाली गुन्हा दाखल करण्यात आला आहे. पोलिसांकडून आरोपींवर कठोर कारवाई केली जाईल, असे पुणे पोलिसांकडून सांगण्यात आले आहे.

 

 

निखिल वागळे यांनी वादग्रस्त पोस्ट केल्यामुळे पुण्यातील वातावरण तापले होते. वागळे पुण्यात पोहोचल्यावर आमचे पोलीस अधिकारी त्यांच्या मुक्कामाच्या ठिकाणी गेले. त्यांना पुणे शहरातील वातावरणाची माहिती दिली. तसेच, आम्ही सांगत नाही तोपर्यंत कार्यक्रमाच्या ठिकाणी जाऊ नका, असे पोलिसांनी सांगितले. कारण त्याठिकाणी आजूबाजूला मोठ्या संख्येने आंदोलक एकत्र आले आहेत. आंदोलकर्त्यांना ताब्यात घेण्याची प्रक्रिया पूर्ण झाल्यानंतर जावे, असे वागळे यांना सांगण्यात आले. दरम्यान, सायंकाळी 6 वाजेपर्यंत 25 आदोलकांच्या गटाला ताब्यात घेण्यात आले असून आणखी काहींना ताब्यात घेण्याची प्रक्रिया सुरु होती. परिसर सुरक्षित करत नाही तोपर्यंत काही वेळ थांबण्यासाठी पोलिसांनी त्यांना समजावण्याचा प्रयत्न केला. मात्र त्यांनी तिथून जाण्याचा आग्रह धरला. रस्त्यांवरील अवजड वाहतुकीमुळे अटकेची प्रक्रिया मंदावली असून बळाचा वापर करणे कठीण होत असल्याची माहिती त्यांना देण्यात आली. परंतु, पोलिसांचा सल्ला डावलून, वागळे हे घटनास्थळी रवाना होण्यासाठी प्रत्यक्ष मार्गात बदल करुन पोलिसांना चकवून निघाले. तरी देखील साध्या वेशातील पोलीस कर्मचार्‍यांनी त्यांना सुरक्षा पुरवण्यासाठी त्यांच्या मागे गाडी नेली.