ब्रेकिंग

धायरी येथे कार्यालयाला आग; जीवितहानी नाही

Samruddhi Dhayagude
08 Feb 2024

पुणे : सिंहगड रस्त्यावरील धायरी फाटा परिसरात असलेल्या एका इमारतीतील कार्यालयात आग लागल्याची घटना बुधवारी घडली. आगीत कार्यालयातील संगणक, विद्युत उपकरणे, तसेच अन्य साहित्य जळाले. कार्यालय बंद असल्याने गंभीर दुर्घटना टळली. अग्निशमन दलाच्या जवानांनी पंधरा ते वीस मिनिटांत आग आटोक्यात आणली. शॉर्टसर्किटमुळे आग लागल्याची शक्यता अग्निशमन दलाने व्यक्त केली

धायरी फाटा परिसरात तीन मजली ओम पॅलेस ही इमारत आहे. इमारतीत पहिल्या मजल्यावर सृष्टी डिझायनर या कंपनीचे कार्यालय आहे. कार्यालयात आग लागल्याची माहिती मिळाल्यानंतर अग्निशमन दलाच्या सिंहगड रस्ता केंद्रातील जवानांनी घटनास्थळी धाव घेतली. कार्यालय बंद असल्याने जवानांनी रहिवाशांकडून चावी घेतली. कार्यालयात कोणी अडकले नसल्याची खात्री जवानांनी केली. त्यानंतर जवान नरेश पांगारे, नीलेश पोकळे, अजित शिंदे, विक्रम मच्छिंद्र, दिग्विजय नलावडे यांनी पाण्याचा मारा करून पंधरा ते वीस मिनिटांत जवानांनी आग आटोक्यात आणली. आगीत संगणक, प्रिंटर, लाकडी सामान, विद्युत उपकरणे, तसेच अन्य साहित्य जळाले. शॉर्टसर्किटमुळे आग लागल्याची शक्यता जवानांनी व्यक्त केली.