ब्रेकिंग

देश

अयोध्येत केएफसीला परवानगी ?

Samruddhi Dhayagude
07 Feb 2024

अयोध्या : राम मंदिर झाल्यानंतर अयोध्येत पर्यटकांची गर्दी होत आहे. रामलल्लाच्या दर्शनासाठी दररोज लाखो लोक येतात. अशा परिस्थितीत विविध उद्योजक आपली बस्तान तिथे बसवण्यामागे लागले आहेत. नुकत्याच उघडलेल्या डॉमिनोजच्या अफाट यशानंतर अधिकाऱ्यांनी आता यूएस स्थित 'केंटकी फ्राइड चिकन' (KFC)चे दुकान उघडण्याचे संकेत दिले. पण त्यांनी फक्त शाकाहारी पदार्थ विकले तर त्यांना परवानगी दिली जाऊ शकते.

KFC साठी ही अट

मनी कंट्रोलने अयोध्येतील विशाल सिंग या सरकारी अधिकाऱ्याचा हवाला देत सांगितले की, 'केएफसीने अयोध्या-लखनौ महामार्गावर आपले केंद्र तयार केले आहे. कारण आम्ही अयोध्येत मांसाहारी पदार्थांच्या विक्रीला परवानगी देत नाही. जर त्यांनी फक्त शाकाहारी पदार्थ विकण्याचा निर्णय घेतला तर आम्ही केएफसीला अयोध्येत जागा देण्यास तयार आहोत. अयोध्येतील पंचकोसी मार्गावर मांस आणि मद्य देण्यावर कडक बंदी आहे. या मार्गामध्ये अयोध्ये भोवती १५ किलोमीटरची तीर्थक्षेत्र असलेली पंच कोसी परिक्रमा समाविष्ट आहे जी रामायणाशी संबंधित पवित्र स्थळांना भेट देते.

मांसाहारी पदार्थांची विक्री न करण्याची अट

ते म्हणाले, “आमच्याकडे नामांकित कंपन्यांकडून अयोध्येत त्यांची दुकाने सुरू करण्याचे प्रस्ताव आहेत. आम्ही त्यांचे स्वागत करतो, पण फक्त एकच बंधन आहे की, ते पंचकोसीत मांसाहारी पदार्थांची विक्री चालणार नाही.'' अयोध्येत मांसाहारावर बंदी ही काही वेगळी बाब नाही. हरिद्वार शहराच्या हद्दीत देखील असेच निर्बंध घातले आहेत. परिणामी, KFC सारख्या आस्थापना शहराच्या बाहेरील भागात, विशेषतः हरिद्वार-रुरकी महामार्गावर आहेत.

मंदिर पर्यटनात वाढ

राज्य सरकारच्या अंदाजानुसार, १७ एप्रिल रोजी रामनवमीपर्यंत साप्ताहिक आधारावर 10-12 लाख पर्यटक अयोध्येला भेट देतील, त्यानंतरही मोठ्या संख्येने पर्यटक येण्याची अपेक्षा आहे. राज्य पर्यटन विभाग 2020 रुपये कोटी पेक्षा जास्त किमतीचे प्रकल्प प्रदर्शित करणार आहे, तर गृहनिर्माण विभाग ३२३४ कोटी किमतीचे प्रकल्प सादर करणार आहे.