ब्रेकिंग

देश

चंपई यांनी ‘विश्‍वास’ जिंकला

Samruddhi Dhayagude
06 Feb 2024

रांची : झारखंडचे मुख्यमंत्री चंपई सोरेन यांच्या नेतृत्वाखालील झारखंड मुक्ती मोर्चाच्या (जेएमएम) आघाडी सरकारने सोमवारी विधानसभेत विश्‍वासदर्शक ठराव जिंकला. झारखंड विधानसभेची सदस्य संख्या 81 असून काल 77 सदस्य सभागृहात उपस्थित होते. विश्‍वासदर्शक ठरावाच्या बाजूने 47 आणि विरोधात 29 मते पडली. अपक्ष आमदार शरयू रॉय गैरहजर होते.

राज्यात झारखंड मुक्ती मोर्चा, काँग्रेस, राष्ट्रीय जनता दल यांची आघाडी आहे. तर, सीपीआयएमएल (एल) आमदाराचा सरकारला बाहेरुन पाठिंबा आहे.

विरोधी पक्ष भाजपचे 29 आमदार असून मित्रपक्ष आजसू पक्षाचे 3 आमदार आहेत.झारखंड मुक्ती मोर्चाचे विधिमंडळ पक्षाचे नेते चंपई सोरेन यांनी 2 फेब्रुवारी रोजी मुख्यमंत्री पदाची शपथ घेतली होती. जेएमएमचे कार्यकारी अध्यक्ष हेमंत सोरेन यांनी मुख्यमंत्री पदाचा राजीनामा दिल्यानंतर चंपई सोरेन यांची विधिमंडळ पक्षनेतेपदी निवड झाली होती. सोरेन यांनी राजीनामा देताच सक्तवसुली संचालनालयाने (ईडी) त्यांना अटक केली होती. कथित भूखंड गैरव्यवहार प्रकरणात ही कारवाई करण्यात आली. चंपई सोरेन यांच्यासमवेत काँग्रेसचे ज्येष्ठ नेते आलमगीर आलम आणि राष्ट्रीय जनता दलाचे (आरजेडी) नेते सत्यानंद भोक्ता यांनी राज्य मंत्रिपदाची शपथ घेतली होती.

राज्यपाल सी.पी. राधाकृष्णन यांनी चंपई सोरेन यांना बहुमत सिद्ध करण्यासाठी 10 दिवसांचा अवधी दिला होता. त्यानंतर, सोरेन यांनी सोमवारी विश्‍वासदर्शक ठराव आणला जाईल, असे स्पष्ट केले होते. त्यानुसार, काल हा ठराव आला.चंपई सोरेन यांच्या शपथविधीनंतर सत्ताधारी पक्षाचे 38 आमदार काँग्रेसशासित तेलंगणाची राजधानी हैदराबादमध्ये विशेष विमानाने गेले होते. जेएमएला भाजपकडून आमदार फोडाफोडीच्या प्रयत्नाची भीती सतावत होती. हे सर्व आमदार रविवारी रात्री उशिरा रांचीमध्ये परतले.

सोरेन यांनी बजावला मतदानाचा हक्क

सक्तवसुली संचालनालयाच्या ताब्यात असलेले हेमंत सोरेन यांनी पीएमएलए (आर्थिक गैरव्यवहार प्रतिबंधक कायदा) न्यायालयाच्या परवानगीनंतर विश्‍वासदर्शक ठरावावरील मतदानात सहभाग घेतला.