महेश लांडगे यांची मागणी
पिंपरी : स्वतंत्र पोलीस आयुक्तायला मान्यता मिळाली. पिंपरी-चिंचवड पोलीस आयुक्तालय निर्माण झाले. त्याच धर्तीवर पिंपरी-चिंचवड शहर विस्तारत आहे. तसेच पुणे जिल्ह्याचाही विस्तार वाढत आहे. त्यामुळे जिल्ह्याचे विभाजन करावे. व शिवनेरी हा नवा जिल्हा करावा अशी मागणी भाजप शहराध्यक्ष आमदार महेश लांडगे यांनी सोमवारी उपमुख्यमंत्री देवेंद्र फडणवीस यांच्याकडे केली.
पिंपरी चिंचवड महापालिकेच्या विविध प्रकल्पांचे भूमिपूजन व उद्घाटन सोमवारी उपमुख्यमंत्री देवेंद्र फडणवीस व पालकमंत्री चंद्रकांत पाटील यांच्या उपस्थितीत झाले. यावेळी गदिमा नाट्यगृहात झालेल्या कार्यक्रमात आमदार महेश लांडगे यांनी पुणे जिल्ह्याच्या विभाजनाची मागणी केली
यावेळी आमदार लांडगे म्हणाले की. पिंपरी-चिंचवड शहर विस्तारत आहे. तसेच पुणे जिल्ह्याचाही विस्तार वाढत आहे. सर्व प्रशासकीय कामांसाठी पुण्याकडे जावे लागते. त्यामुळे जिल्ह्याचे विभाजन करावे आणि ‘शिवनेरी’ हा नवा जिल्हा करावा व पिंपरी-चिंचवडला स्वतंत्र्य तालुका म्हणून निर्मिती करावी. मात्र माझी ही मागणी राजकीय दृष्ट्या नाही तर प्रशासकीय दृष्टीने आहे हे पत्रकार बांधवांनी लक्षात घ्यावे असे ते म्हणाले.शास्तीकराचे ओझे सर्वाधिक माझ्यावर होते. कारण, लोक वारंवार विचारत होते. शास्तीकर माफीच्या घोषणेचे काय झाले? पण, देवेंद्र फडणवीस यांनी शास्तीकर पूर्ण माफ केला. त्याचा आनंद सर्वाधिक झाला.
दिवंगत आमदार लक्ष्मण जगताप यांच्या स्मरणार्थ 200 खाटांचे कॅन्सर हॉस्पिटल, मोशीत 850 खाटांचे अत्याधुनिक रुग्णालय उभारण्यात येत आहे. शहराचा सर्वांगीण विकास होत असताना शहरातील खेळाडू ऑलिम्पिकमध्ये चमकावा. याकरिता कबड्डी आणि कुस्तीसारख्या पारंपरिक खेळांनाही प्रोत्साहन द्यावे. अशी मागणी आमदार लांडगे यांनी आपल्या भाषणात केली.
