पिंपरी : जुन्या पेन्शन योजनेसह विविध मागण्यांसाठी सरकारी कर्मचार्यांनी संप पुकारला असून पिंपरी-चिंचवड महापालिकेतील सुमारे तीन हजार 152 कर्मचारी संपावर गेले आहेत. त्यामुळे महापालिकेचे कामकाज ठप्प झाले होते. अतिरिक्त आयुक्तांसह वरिष्ठ अधिकार्यांना स्वत:च्या वाहनाने महापालिकेत यावे लागले.
एकीकडे महापालिका आयुक्त शेखर सिंह हे पिंपरी चिंचवड महापालिकेचे सन 2023 -24 चे अंदाजपत्रक सादर करत असताना दुसरीकडे पिंपरी-चिंचवड महापालिका कर्मचारी महासंघाचे अध्यक्ष शशिकांत झिंजुर्डे यांच्या नेतृत्वाखाली सर्व कर्मचारी महापालिकेच्या मुख्य प्रवेशद्वारासमोर एकत्र जमले . एकच मिशन जुनी पेन्शन, अशा टोप्या कर्मचार्यांनी परिधान केल्या होत्या. तीन हजार 152 कर्मचारी संपावर गेले आहेत. वाहनचालकदेखील संपात सहभागी झाले. त्यामुळे अतिरिक्त आयुक्तांसह वरिष्ठ अधिकार्यांना खासगी वाहनाने महापालिकेत यावे लागले. महापालिकेचे संपूर्ण कामकाज ठप्प झाले होते. महापालिकेतील वर्ग एक ते वर्ग चारमध्ये सात हजारांपेक्षा जास्त कर्मचारी कार्यरत आहेत. मात्र, 2005 नंतर महापालिका सेवेत तीन हजार 152 कर्मचारी रुजू झाले आहेत. या सर्व कर्मचार्यांना जुनी पेन्शन योजना लागू करावी. प्रदीर्घ काळ कंत्राटी काम करणार्या कामगारांना समान वेतन देऊन सेवेत नियमित करावे. महापालिकेतील रिक्तपदे भरावीत. अनुकंपा तत्त्वावरील नियुक्त्या तसेच कोरोना काळात निधन झालेल्या कर्मचार्यांच्या पाल्यांना वयात सूट देऊन सेवेत सामावून घ्यावे. केंद्र सरकारच्या धर्तीवर विविध भत्ते लागू करावेत. चतुर्थश्रेणीतील पदे निरस्त करू नयेत. शिक्षक – शिक्षकेतर कर्मचार्यांचे सेवांतर्गत प्रश्न तात्काळ सोडवावेत. सेवानिवृत्तीचे वय 60 करावे. आरोग्य विभागातील नर्स व कर्मचार्यांचे आर्थिक व सेवा नियमांच्या समस्यांचे निराकरण करावे, यासह विविध मागण्यांसाठी कर्मचारी संपावर गेले आहेत.
