सोलापूर : सोलापूर शहराच्या लगतच असलेल्या अक्कलकोट रस्त्यावरील एमआयडीसीतील एका रबराच्या फॅक्टरीला बुधवारी पहाटेच्या सुमारास मोठी आग लागली. ही आग विझवण्यासाठी अग्निशमन दलाच्या २५ गाड्या घटनास्थळावर दाखल झाल्या. आग आटोक्यात आणण्याचे काम संध्याकाळ पर्यंत सुरूच आहे.
एमआयडीसी मधील रबर फॅक्टरीला आग लागल्यानंतर आसपासच्या गारमेंट कारखान्यांनाही आगीने घेरले. मध्यरात्री दीडच्या सुमारास लागलेली आग सकाळी साडेसहापर्यंत धुमसत होती. सोलापूर महापालिका, तसेच एमआयडीसी, एनटीपीसी, अक्कलकोट शहर, बार्शी येथून २० ते २५ अग्नीशमन गाड्या बोलावून करूनही आग आटोक्यात आली नाही. परिसरातील इतर कारखानदार हवालदिल झाले. मिळेल ते साहित्य हलवण्यासाठी शर्थीचे प्रयत्न करण्यात आले . मनपाचे अग्निशामक दलाचे अधीक्षक केदार आवटे यांच्यासह २५ जणांची टीम आग नियंत्रणात आणण्यासाठी सक्रिय झाली होती. यावेळी आगीत कोणतीही जिवितहानी झाली नाही. या आगीत सुमारे कोट्यवधी रुपयांची मालमत्ता भस्मसात झाल्याची प्राथमिक माहिती आहे.
