वर्धा नगरीतील उत्साह शिगेला
राष्ट्रपिता महात्मा गांधी साहित्य नगरी, (वर्धा) : महात्मा गांधी आणि आचार्य विनोबा भावे यांच्या विचारांनी प्रगल्भ झालेल्या वर्धा नगरीत शुक्रवारी 96 व्या अखिल भारतीय मराठी साहित्य संमेलनास परंपरेनुसार दिंडीने सुरुवात झाली. या ग्रंथ दिंडीत पारंपरिक वेश परिधान करून विद्यार्थी, साहित्यिक सहभागी झाले होते. भजनी मंडळे, विविध महिला मंडळे तसेच महापुरुषांच्या वेषभूषेतील विद्यार्थी ग्रंथ दिंडीचे आकर्षण ठरले.
अखिल भारतीय मराठी साहित्य महामंडळ आणि विदर्भ साहित्य संघाच्या वतीने आयोजित या संमेलनामुळे वर्धा नगरीतील नागरिकांचा उत्साह ग्रंथ दिंडीत ओसंडून वाहत होता. अखिल भारतीय मराठी साहित्य महामंडळाच्या अध्यक्षा प्रा. उषा तांबे, कार्यवाह डॉ. उज्ज्वला मेहेंदळे, कोषाध्यक्ष प्रकाश पागे, विदर्भ साहित्य संघाचे अध्यक्ष प्रदीप दाते, आमदार पंकज भोयर यांच्या हस्ते महात्मा गांधी यांच्या पुतळ्याला पुष्पहार अर्पण करण्यात आला. ग्रंथांचे व पालखीचे विधिवत पूजन करून ग्रंथ दिडीला सुरुवात झाली.
त्यानंतर वाजतगाजत, विठ्ठलाच्या गजरात ग्रंथ दिंडी संमेलन स्थळाकडे रवाना झाली. डॉ. बाबासाहेब आंबेडकर चौक, पोस्ट ऑफिस चौक, सेंट अँटॉनी नॅशनल स्कूल, छत्रपती शिवाजी महाराज चौक अशी ही ग्रंथ दिंडी निघाली. ग्रंथ दिंडीमध्ये विठ्ठल-रुखुमाई, संत समर्थ रामदास स्वामी, संत तुकाराम महाराज, संत ज्ञानेश्वर महाराज, संत एकनाथ, चक्रधर स्वामी, महात्मा गांधी, तुकडोजी महाराज, संत जनाबाई, छत्रपती शिवाजी महाराज, जिजाऊ, झांशीची राणी लक्ष्मीबाई, रझिया सुलतान, मदर टेरेसा आदी महान व्यक्तींच्या वेशभूषेत विविध शाळांतील विद्यार्थी सहभागी झाले होते. अखिल भारतीय श्री गुरुदेव सेवा मंडळ, मोझरीच्या विद्यार्थ्यांनी टाळ मृदंगाच्या गजरात ’जय हरी विठ्ठल’ असा गजर केला. ग्रंथ दिंडीचे स्वागत ठिकठिकाणी पुष्पवर्षाव करून करण्यात आले. ग्रंथ दिंडी संमेलन स्थळावर पोहोचताच साहित्याचा जयघोष झाला.
सूत कातून ग्रंथ दिंडी
चरखा ही वर्धा शहराची ओळख आहे. त्यामुळे चरख्यावर सूत कातून त्या सुताचा वापर ग्रंथ दिंडीसाठी करण्यात आला. चरख्यावर सूत कातून वर्धा जिल्ह्याची परंपरा यातून व्यक्‍त करण्यात आली. ग्रंथदिंडीतील पालखीत लीळाचरित्र, श्रीज्ञानेश्वरी, भारताचे संविधान आदी ग्रंथांचा समावेश होता.
मराठीची पताका सर्वसमावेशक
सेंट अँटनी नॅशनल स्कूलचे मुख्याध्यापक फादर सुबिन, व्यवस्थापक फादर व्हिंसेंट, उपमुख्याध्यापक सिस्टर जिस रॉस यांनी ग्रंथ दिंडी शाळेसमोर पोहोचताच सूताचा हार घालून आणि मराठी परंपरेप्रमाणे आरती ओवाळून, टिळा लावून स्वागत केले. दिंडीमध्ये जात, धर्म, विचार भेद दूर सारून सारेच सहभागी झाले आणि मराठीची ध्वज पताका आमच्या हाती सर्वसमावेशक असल्याची भावना दृढ केली.
उषा तांबे यांच्या हस्ते ध्वजारोहण
संमेलन स्थळी महामंडळाच्या अध्यक्ष प्रा. उषा तांबे यांच्या हस्ते साहित्य ध्वज फडकवण्यात आला. यावेळी 95व्या साहित्य संमेलनाचे अध्यक्ष भारत सासणे, कार्यवाह डॉ. उज्ज्वला मेहेंदळे, विलास मानेकर, महाराष्ट्र साहित्य परिषद कार्याध्यक्ष प्रा. मिलिंद जोशी आदी उपस्थित होते.
