मुंबई : हिंडेनबर्गच्या अहवालानंतर गौतम अदानी समूहाला मोठा दणका बसला आहे. अदानी समूहातील सर्व कंपन्यांच्या शेअर्समध्ये घसरण झाली असून गौतम अदानी श्रीमंतांच्या यादी पहिल्या १० मधून बाहेर पडले. शेअरमधील होणाऱ्या घसरणीच्या पार्श्वभूमीवर समूहाने एफपीओ मागे घेण्याचा निर्णय घेतला. अशाच आता अदानी ग्रुपला आणखी एक मोठा धक्का बसला आहे.
अदानी समूहांबद्दल वेगवेगळ्या चर्चा सुरू असताना भारतीय रिझर्व्ह बँकेने एक मोठे पाऊल उचलले आहे. आरबीआयने देशातील सर्व बँकांना अदानी ग्रुपच्या कंपन्यांना दिलेल्या कर्जाची माहिती देण्याचे आदेश दिले आहेत. रॉयटर्स वृत्तसंस्थेने ही माहिती दिली. सूत्रांनी नाव न सांगण्याच्या अटीवर ही माहिती दिल्याचे रॉयटर्सने आपल्या वृत्तात म्हटले.
अदानी ग्रुपच्या कंपन्यांच्या शेअर्समध्ये गुरुवारी देखील मोठी घसरण झाल्याचे चित्र दिसले. गौतम अदानी यांनी बुधवारी एफपीओ रद्द करण्याची घोषणा केली होती. गेल्या काही दिवसांपासून अदानी समूहावरील संकट गडद होत आहे. सिटीग्रुपच्या वेल्थ युनिटने देखील अदानी ग्रुपला मोठा झटका दिला होता.
सिटीग्रुपने गौतम अदानींच्या कंपन्यांची सिक्युरिटीज घेणे बंद केले होते. हिंडेनबर्ग रिसर्च रिपोर्टनंतर भारतीय बँकांनी अदानी समूहाची चौकशी सुरू केली. या पार्श्वभूमीवर सिटीग्रुपच्या वेल्थ युनिटने हा निर्णय घेतला आहे. सिटीग्रुपच्या आधी क्रेडिट सुइसने अदानी समुहाला झटका दिला होता. हिंडेनबर्गच्या रिपोर्टनंतर त्यांनी अदानी ग्रुपच्या कंपन्यांची सिक्युरिटी घेणे बंद केले होते.
