“तुरुंगात सुरक्षित राहण्यासाठी ‘आप’च्या नेत्याला १० कोटी दिले”,
दिल्ली : २०० कोटींच्या आर्थिक गैरव्यवहार प्रकरणात फसवणूक केल्याप्रकरणी सुकेश चंद्रशेखर सध्या तिहार तुरुंगात आहे. त्यातच सुकेश चंद्रशेखरने एक मोठा दावा केला आहे. आम आदमी पक्षाच्या नेत्याने १० कोटी रुपयांची खंडणी मागितल्याचा आरोप सुकेश चंद्रशेखरने केला आहे. तसेच, याप्रकरणाच्या चौकशीची मागणीही सुकेशने केली आहे. त्याच्या दाव्यानंतर एकच खळबळ उडाली आहे.
सुकेश चंद्रशेखर याने दिल्लीच्या तिहार कारागृहातून नायब राज्यपाल व्ही. के. सक्सेना यांना पत्र लिहले. त्या पत्रात आपचे नेते सत्येंद्र जैन यांनी १० कोटी रुपये तुरुंगात सुरक्षित राहण्यासाठी मागितल्याचा आरोप केला आहे. तसेच, आपला ५० कोटी रुपयांची देणगी दिल्याचंही सुकेशने आपल्या पत्रात नमूद केले.
सुकेशने आपल्या पत्रात म्हटले, “२०१५ पासून सत्येंद्र जैन यांना मी ओळखत आहे. त्यांनी दक्षिण भारतात मोठे पद आणि राज्यसभेची उमेदवारी देण्याचे आश्वासन दिले होते. यासाठी आपला ५० कोटी रुपयांची देणगीही दिली होती. त्यानंतर २०१७ मध्ये मला अटक करण्यात आली, तेव्हापासून मी तिहार तुरुंगात आहे.”
“तत्कालीन तुरुंग मंत्री सत्येंद्र जैन यांनी माझी बऱ्याचदा भेट घेतली. २०१९ मध्ये ही सत्येंद्र जैन यांनी माझी भेट घेतली. त्यांचे सचिव सुशील यांनी तुरुंगात सुरक्षितपणे राहण्यासाठी दरमहा २ कोटी रुपयांची मागणी केली. त्यानंतर माझ्यावर दबाव टाकून दोन ते तीन महिन्यांत १० कोटी रुपये वसूल करण्यात आले. हे सर्व पैसे जैन यांचा कोलकात्यातील निकटवर्तीय चतुर्वेदी याच्याकडे दिले,” असेही चंद्रशेखर याने म्हटले.
