अहमदाबाद : कर्णधार शंकरच्या नेतृत्वाखाली महाराष्ट्र पुरुष कबड्डी संघाने 36 व्या नॅशनल गेम्समध्ये सलग दुसरा विजय साजरा केला. फॉर्मात असलेल्या महाराष्ट्र संघाने दुसर्‍या सामन्यात चंदीगडला धुळ चारली. महाराष्ट्राच्या संघाने 60-21 ने दणदणीत विजयाची नोंद केली. संघाच्या विजयासाठी आकाश, असलम, पंकज मोहिते, मयुर कदम यांची कामगिरी महत्त्वपूर्ण ठरली. त्यामुळे महाराष्ट्र संघाला आपली विजयी मोहिम कायम ठेवता आली. आता महाराष्ट्राचा गटातील तिसरा आणि शेवटचा सामना सर्व्हिसेस टीमविरुद्ध होणार आहे. यातील विजयाने महाराष्ट्राला बाद फेरीचा प्रवेश निश्चित करता येणार आहे. पहिल्याच सामन्यातील विजयाने आमविश्वास बुलंदीवर असलेल्या महाराष्ट्र संघाला दुसर्‍या लढतीत चंदीगडविरुद्ध शेवटपर्यंत आपला दबदबा कायम ठेवता आला. यातून चंदीगडला मोठ्या फरकाने पराभवाला सामोरे जावे लागले. यादरम्यान महाराष्ट्राकडून आकाश, अक्षय, मयूर यांची खेळी कौतुकास्पद ठरली. यातून महाराष्ट्राने दमदार सुरुवात केली.
