जिल्हा परिषदेत दबक्या आवाजात चर्चा
सांगली : राज्यभर गाजत असणार्‍या टीईटी (शिक्षक पात्रता परीक्षा) गैर व्यवहारातील काही प्रमाणपत्रे सांगली जिल्हा परिषदेकडेही आल्याची चर्चा सुरू असून, अशी तीन प्रमाणपत्रे सांगली जिल्हा परिषदेकडे आहेत. गैरप्रकार करून काढण्यात आलेल्या त्या प्रमाणपत्रामध्ये एका मंत्र्याच्या मुलीचे प्रमाणपत्र असल्याची चर्चाही जिल्हा परिषदेत दबक्या आवाजात सुरू आहे.
मात्र हे प्रमाणपत्र सांगलीत कसे आले, याचा शोध मात्र अद्यापही लागलेला नसल्याची माहिती मिळाली. याबाबतचा गोपनीय अहवाल शासनास पाठवण्यात आला असून, ही बाब गोपनीय असल्याचे सांगत ठोस माहिती देण्यास कोणीही तयार नाही.
जिल्ह्यात 2019 मध्ये टीईटी (शिक्षक पात्रता परीक्षा) घेण्यात आली होती. याच परीक्षेत गैरप्रकार झाल्याचे समोर आले आहे. या काळात जिल्ह्यात 609 जण टीईटी उत्तीर्ण झाले आहेत. यांतील काहीजणांनी गैरप्रकारे प्रमाणपत्र मिळवल्याची चर्चा आहे. त्यामुळे शासनाकडून आलेल्या आदेशानुसार जिल्ह्यात टीईटी परीक्षा उत्तीर्ण होऊन शिक्षक म्हणून नियुक्त झालेल्या शिक्षकांची कागदपत्रे तपासणीसाठी तालुकानिहाय शिबिर लावण्यात आले होते. या शिबिरातून घेण्यात आलेले 197 जणांचे प्रमाणत्र शासनाकडे सादर करण्यात आले आहे. याची राज्यस्तरावर पडताळणी सुरू आहे. तसेच या गैरप्रकाराचा तपास आता ‘ईडी’ करीत आहे. त्यामुळे परीक्षा उत्तीर्ण झालेल्या सर्व उमेदवारांच्या मागे आता चौकशीचा ससेमिरा लागणार आहे.
टीईटीच्या परीक्षेतील गैरप्रकार उघडकीस आल्यानंतर शासनाने 7 हजार 874 उमदेवारांना अपात्र ठरविले होते. मात्र त्यातील सुमारे 576 उमेदवार आजही विविध शाळांत कार्यरत असल्याची माहिती समोर आली आहे. त्यामुळे शिक्षण संचालनालयाने त्यांचे शालार्थ आयडी गोठविले आहे. याप्रकरणी जिल्ह्यातील प्राथमिकचे 6 आणि माध्यमिकचे 2 असे एकूण 8 जणांचे वेतन थांबविण्याचे आदेश जिल्हा परिषदेला आले आहेत.
परीक्षेतील गुणांमध्ये वाढ करून फेरबदल केलेल्यांची संख्या 120 आहे. तसेच अपात्र असताना बनावट प्रमाणपत्र तयार करून घेतलेले 3 उमेदवार जिल्ह्यात परीक्षेला बसलेले आहेत. त्यामुळे प्रत्यक्षात 123 शिक्षकांचा या घोटाळ्यात समोवश आहे, असा आरोप स्वतंत्र भारत पक्षाचे अध्यक्ष सुनील फटारे यांनी शिक्षण आयुक्तांकडे केली आहे.
जिल्हा परिषदेकडे रजिस्टरने आलेल्या तीन प्रमाणपत्रापैकी एकाचा वापर झाला आहे. तसेच दोन प्रमाणपत्र शिक्षण विभागाकडेच असल्याची माहिती सूत्रांनी दिली. यातील एक प्रमाणपत्र एका बहुचर्चित मंत्र्याच्या मुलीचे असल्याची चर्चा आहे.
दि. 19 जानेवारी 2020 रोजी झालेल्या परीक्षेसंदर्भात हे प्रमाणपत्र आहे. तसेच दि. 23 मार्च 2021 रोजी हे प्रमाणपत्र जिल्हा परिषदेकडे प्राप्त झाल्याची चर्चा आहे. मात्र हे प्रमाणपत्र सांगलीत कसे आले, याच्या मागे कोण आहे, याची माहिती मात्र मिळालेली नाही. सध्या या प्रकरणाची पोलिसांमार्फत चौकशी सुरू आहे. येत्या काही दिवसांत मोठा उलगडा होण्याची शक्यता आहे.
