ईडीकडून विशेष पीएमएलए प्रतिज्ञापत्र दाखल
मुंबई : सक्तवसुली संचालनालयाने (ईडी) राष्ट्रवादी काँग्रेसचे नेते नवाब मलिक यांच्या जामीन अर्जाला पुन्हा विरोध केला आहे. दाऊद इब्राहिमची बहीण हसीना पारकर हिच्याशी संबंधित आर्थिक गैरव्यवहार प्रकरणात राष्ट्रवादी काँग्रेसचे नेते नवाब मलिक यांचा सक्रिय सहभाग होता. त्यामुळे त्यांना जामीन देऊ नये, असे ईडीने न्यायालयात म्हटले आहे.
नवाब मलिक यांना फेब्रुवारीमध्ये आर्थिक गैरव्यवहार प्रकरणी अटक झाली होती. तसेच ईडीकडून एप्रिल २०२२ मध्ये त्यांच्याविरोधात आरोपपत्र दाखल करण्यात आले होते. त्यानंतर मलिक यांनी विशेष पीएमएलए न्यायालयात जामीनासाठी अर्ज केला होता.
ईडीने दाखल केलेल्या आरोपपत्रानुसार, मलिक, त्याचा भाऊ अस्लम, हसीना पारकर आणि १९९३ च्या मुंबई बॉम्बस्फोटातील दोषी सरदार खान यांच्यात कुर्ल्यातील गोवाला कंपाऊंड संदर्भात बऱ्याच बैठका झाल्या होत्या. ही जागा खरेदी करण्यासाठी हसीना पारकरला ५५ लाख रुपये बेकायदा दिले गेले. या बेकायदा व्यवहारात नवाब मलिक यांचा सक्रीय सहभाग होता, असा दावा ईडीकडून करण्यात आला आहे.
नवाब मलिक गेल्या सहा आठवड्यापासून वैद्यकीय उपचारासाठी तुरुंगाबाहेर आहेत. हे लपवण्यासाठी जामीन अर्जाचे षडयंत्र रचले जात आहेत. त्यांना आता पुढील उपचाराची गरज नाही. त्यामुळे त्यांना पुन्हा तुरुंगात पाठवावे, असेही ईडीकडून सांगण्यात आले.
