नवी दिल्ली : दिल्लीतून धक्कादायक बातमी हाती आली आहे. दिल्लीतील गाझीपूर फूल मार्केट येथे एका बॅगमध्ये साधारण तीन किलो वजनाचा आयईडी बॉम्ब आढळल्याने खळबळ उडाली आहे. वेळीच हा बॉम्ब डिफ्यूज करण्यात यश आल्याने मोठा अनर्थ टळला असून या प्रकरणी दिल्ली पोलीस व अन्य सुरक्षा यंत्रणा कसून तपास करत आहेत.

दिल्लीचे पोलीस आयुक्त राकेश अस्थाना यांनी याबाबत माहिती दिली. गाझीपूर फुल बाजार येथे एक बेवारस बॅग असल्याची माहिती अकराच्या सुमारास मिळाली. त्यानंतर पोलीस पथकाने तातडीने तिथे धाव घेतली. बॉम्ब शोधक आणि नाशक पथक तसेच अग्नीशमन दलालाही बोलावले. तपास केला असता बॅगमध्ये आयईडी बॉम्ब असल्याचे स्पष्ट झाले. त्यानंतर मोकळ्या जागेत ही बॅग नेऊन एका खड्ड्यामध्ये बॉम्बचा नियंत्रित स्फोट घडवून आणण्यात आला, असे अस्थाना यांनी सांगितले. एनएसजीच्या पथकाने ही प्रक्रिया पार पाडली. या भागात स्फोटाचा मोठा आवाज झाला आणि धुराचे लोळही उठले, असे स्थानिकांनी सांगितले.

दिल्ली पोलिसांच्या स्पेशल सेलने आयईडी बॉम्ब प्रकरणी अज्ञात व्यक्तीविरुद्ध गुन्हा दाखल केला आहे. एका स्कूटीवर ही बॅग ठेवण्यात आली होती. याबाबत संशय आल्याने स्थानिक दुकानदाराने पोलिसांना खबर दिली होती. घटनास्थळी कसून तपास सुरू असून स्थानिकांकडून अधिक माहिती पोलीस घेत आहेत. फॉरेन्सिक टीमही घटनास्थळी पोहचली आहे. बॅगमध्ये तीन किलो आरडीएक्स आणि अमोनियम नायट्रेट आढळले. साधारण तीन किलो वजनाचा हा बॉम्ब होता. त्याला टायमरही लावण्यात आला होता. हा बॉम्ब कुणी प्लांट केला, यामागे दहशतवादी संघटनेचा तर हात नाही ना, याचा तपास पोलीस करत आहेत. गाजीपूरसह संपूर्ण दिल्लीतील सुरक्षा यंत्रणाही या घटनेनंतर अधिक सतर्क झाल्या आहेत.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा