मुंबई : मराठी मनोरंजन विश्वातील ज्येष्ठ अभिनेत्री रेखा कामत यांचे वृद्धापकाळाने मंगळवारी निधन झाले. माहिम येथील त्यांच्या निवासस्थानी त्यांनी अखेरचा श्वास घेतला. त्या ८९ वर्षांच्या होत्या.

रेखा आणि त्यांची बहीण चित्रा यांनी शाळेत असतानाच नृत्याचे आणि गायनाचे प्रशिक्षण घेतले होते. नृत्यनाटिकेमुळे दोन्ही बहिणींना थेट चित्रपटात काम करण्याची संधी मिळाली होती. या दोघी बहिणींमध्ये कुमुद सुखटणकर म्हणजे ज्येष्ठ अभिनेत्री रेखा कामत या थोरल्या तर कुसुम सुखटणकर म्हणजे अभिनेत्री चित्रा नवाथे या धाकट्या होत्या.

१९५२ मध्ये प्रदर्शित झालेला ‘लाखाची गोष्ट’ हा रेखा यांचा पहिला चित्रपट. यामध्ये चित्रा यांनीसुद्धा काम केले होते. राजा परांजपे, ग. दि माडगूळकर आणि सुधीर फडके या त्रिमूर्तींचा हा सिनेमा होता. कुमुद आणि कुसुम ही जुन्या वळणाची नावे नकोत म्हणून सिनेमासाठी या दोघींची नावे बदलण्यात आली. ग.दि. माडगूळकर यांनी रेखा आणि चित्रा असे नामकरण केल्याची, आठवण रेखा यांनी एका मुलाखतीमध्ये सांगितले होती. त्याच नावाने या दोघीजणी पुढे ओळखल्या गेल्या. या सिनेमाच्या संवाद लेखनाची बाजू ग.दि. माडगुळकरांसोबतच ग.रा. कामत हे देखील सांभाळत होते. तिथेच कामत आणि रेखा यांची ओळख झाली. त्यानंतर या दोघांनी १९५३ मध्ये विवाह केला.

रेखा कामत आणि चित्रा नवाथे या सख्ख्या बहिणींनी मराठी सिनेसृष्टीचा सुवर्णकाळ गाजवला होता. ‘कुबेराचे धन’, ‘गृहदेवता’, ‘मी तुळस तुझ्या अंगणी’, ‘गंगेत घोडे न्हाले’, ‘अग्गंबाई अरेच्चा’, ‘गृहदेवता’,’बायको माहेरी जाते’ हे रेखा यांचे गाजलेले चित्रपट. अलिकडच्या काळातही रेखा कामत यांनी वास्तुपुरुष, अग्गंबाई अरेच्चा या सिनेमांतही काम केले होते.

व्यावसायिक रंगभूमीवरही रेखा यांनी आपल्या अभिनयाचा ठसा उमटवला. ‘एकच प्याला’, ‘संशयकल्लोळ’, ‘भावबंधन’ यांसारख्या संगीत नाटकांमधून तसेच ‘तुझं आहे तुजपाशी’, ‘लग्नाची बेडी’, ‘प्रेमाच्या गावे जावे’, ‘दिल्या घरी तू सुखी राहा’, ‘सुंदर मी होणार’, ‘कल्पवृक्ष कन्येसाठी’, ‘दिवा जळू देत सारी रात’ यांसारख्या व्यावसायिक नाटकांतून त्यांनी भूमिका केल्या. त्याचप्रमाणे रेखा कामत यांनी मोहन वाघ यांच्या चंद्रलेखामधून ‘तरुण तुर्क म्हातारे अर्क,’, ‘ऋणानुबंध’,’गोष्टी जन्मांतरीच्या’या नाटकांमध्येही काम केले होते. इतकेच नाही तर बदलत्या काळानुसार त्यांनी काही मालिकांमध्ये ही काम केले होते. त्यामध्ये प्रपंच, माणूस, याला जीवन ऐसे नाव, सांजसावल्या, एका ल्गनाची दुसरी गोष्ट या मालिकांमध्येही रेखा कामत यांनी भूमिका साकारल्या होत्या.

रेखा कामत यांनी अभिनयाच्या क्षेत्रात केलेल्या प्रदीर्घ कारकिर्दीसाठी त्यांना २००५ मध्ये जनकवी पी. सावळाराम पुरस्कार, २००७ मध्ये महाराष्ट्र सरकारचा जीवन गौरव पुरस्कार तर दूरदर्शन सह्याद्री वाहिनीचा २०१२ मध्ये नवरत्न पुरस्काराने गौरवण्यात आले होते. काही वर्षांपूर्वी त्यांनी प्रकृती अस्वास्थ्यामुळे अभिनयातून निवृत्ती स्वीकारली होती.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा