मुंबई : माजी पंतप्रधान इंदिरा गांधी व कुख्यात डॉन करीम लाला यांच्या भेटीबद्दलचे वक्तव्य शिवसेनेचे खासदार संजय राऊत यांनी मागे घेतले. महाविकास आघाडीमध्ये बिघाडी निर्माण होण्याची शक्यता लक्षात घेऊन त्यांनी माघार घेतली. ‘इंदिरा गांधी यांच्याबद्दल मी केलेल्या वक्तव्यामुळे कुणाच्या भावना दुखावल्या असतील तर मी वक्तव्य मागे घेतो,’ असे त्यांनी म्हटले.

‘मुंबईतील अंडरवर्ल्ड हे शिकागोच्या अंडरवर्ल्डपेक्षा अधिक भयंकर होते. त्या काळात गुंडाला भेटायला अख्खं मंत्रालय खाली येत असे. करीम लालाला भेटण्यासाठी इंदिरा गांधीही आल्या होत्या,’ असे वक्तव्य राऊत यांनी एका कार्यक्रमात केले होते. त्यावरून काँग्रेसने तीव्र नाराजी व्यक्त केली होती. राऊत यांनी हे वक्तव्य मागे घ्यावे, अशी मागणी काँग्रेसच्या काही नेत्यांनी केली होती. त्या पार्श्वभूमीवर आज मुंबईत घेतलेल्या पत्रकार परिषदेत राऊत यांनी आपल्या वक्तव्याचा खुलासा केला होता. मात्र, त्यानंतरही वाद थांबला नाही. त्यामुळे अखेर राऊत यांनी आपले वक्तव्य मागे घेतले.

‘खरंतर काँग्रेसच्या मंडळींनी माझे वक्तव्य मनाला लावून घेण्याची गरज नव्हती. मी आजवर बऱ्याचदा इंदिरा गांधी यांच्या भूमिकांचे समर्थन केले.तरीही माझ्या वक्तव्यानं इंदिरा गांधी यांच्या प्रतिमेला तडा गेला असेल किंवा कुणाच्या भावना दुखावल्या असतील तर मी माझे वक्तव्य मागे घेतो,’ असे त्यांनी म्हटले.

- Advertisement -

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा